من خلال متابعتى للاحداث فى الكام يوم اليى فاتوا فيه شوية نقاط عاوز اتكلم فيهم من باب الفضفضه لا اكتر ولا اقل .
1- خلى دايما عندك امل فى الله واوعى تفقد الثقه فى رحمة الله ولا فى كرمه بس طبعا ده لا يمنع انك تاخد بكل السبل والاحتياطات علشان تحمى نفسك وبعد كده سيبها على الله وثق من جواك انه هيحميك وهيحفظك طالما عملت اليى عليك .. احنا محتاجين نحس برحمة الله فعلا الاحساس بالرحمه والطمأنينه ده شىء كويس حتى من الناحيه العلميه لانه هيرفع الروح المعنويه وهيقوى جهاز المناعه وده شىء لو تعلمون عظيم جدا جدا .. ياريت المشايخ ياخدوا بالهم من النقطه دى ويبطلوا نغمة ده بسبب الذنوب والكلام ده مش وقته الله يكرمكم ..
2- بلاش تدخل فى تفاصيل الفيروس يعنى اكتر من اللازم طالما انت مش متخصص معرفتك بسلوك الفيروس داخل جسمك مش حاجه حلوه خالص . الموضوع اشبه بالواحد اليى بيدخل للدكتور ماشى على رجله واول ما يعرف انه عنده مرض خطير بيطلع من عند الدكتور متشال على كرسى ولا حاجه .. بلاش فزلكه دلوقتى يعنى مش حبكت مانت طول عمرك منفض خليك منفض الله يكرمك
3- الناس اليى عينت نفسها متحدث رسمى باسم الكورونا الله يكرمكم احياة النبى يا شيخ منك له بطلوا بضان عندك خبر حلو اقوله مش عندك اتنيل على عينك واسكت
4- بلاش نشر حالة الهلع والذعر بين الناس فلان اتصاب وفلان ماعرفش طلع له كورونا فى الحمام علشان خاطر النبى انتوا كمان بطلوا بضان برده تعالى على نفسك شويه واكتم الصحفى اليى جواك وبعد لما كورونا يمشى ابقى طلع الصحفيى اليى جواك ولو ماعرفتش تطلعه تأكد ان الناس هتطلعهولك .
5- بخصوص بعض الاطباء اليى استقالوا ولا هددوا بالاستقاله ولا ماعرفش عملوا ايه .بصوا اخد الحق حرفه ومعلمه ولازم تبقى صايع وانت بتاخد حقك ومتبقاش غشيم اليى انت عملته او هتعمله ده غشم انا عارف ان معاك حق وعارف انك طالع عين اهلك وبتشتغل فى ظروف صعبه ولكن صدقنى الكلام عن الاستقاله فى الوقت ده مش فى صالحك خالص وهيتفهم حاجه تانيه خالص غير اليى انت عاوزه ومش حل ماهو احنا كلنا فى كلوزد سيستم وكله فى الاخر هيلبس ويتأثر بشكل ما انت يعنى لو قعدت فى بيتك انت وغيرك خلاص الفيروس هيقولك والله لاسيب لكم البلد وامشى ..ولكن فى الاول والاخر القرار الاول والاخير لك . ولكن فيه نقطه لو انت قررت تمشى فامشى فى سكات يعنى انا مش فاهم واحد قرر يستقيل فى ظرف زى ده نشر ليه الاستقاله على الفيس بوك انا بجد وقفت عند السلوك ده علشان افهم المغزى منه ماعرفتش ولانى مبحبش التخوين ولا طبعى ففسرته على انه عته وقلة خبره .. لان الاستقاله فى الوقت ده مش حاجه حلوه اصلا انك تنشرها ولا حاجه تدعوا الى الفخر وتبقى عبيط لو فكرت ان الناس هتتعاطف معاك حتى لو معاك حق . اقولك تانى خليك صايع وفكر ومتخليش حد يسخنك . انت المفروض كريمة المجتمع يا دكتره .
ويلا تصبحوا على خير وجمعه مباركه عليكم جميعا
ليست هناك تعليقات:
إرسال تعليق