عم جمال ولأول مره فى المزاد بتاع البوفيه حد يدخل قصاده عشان ياخده منه ...كان دايما محدش بيدخل معاه ...كله كان حابب الراجل وعاوزه يقعد ومفضل وجوده ...كان جزء من حياة الكل اليوميه ...وكلاء النيابه والمحامين واى حد ليه علاقه بالمحكمه ..كانت روحه جميله وكلمه منه تنسيك همومك ...
اللى دخل قصاده علا التمن جامد ...حاولنا نساعده ..رفض وقال مش هقدر ادفع التمن الغالى ده كل شهر ...ساب البوفيه ...
انقطعت اخباره كام يوم ...ويوم الصوره جالى ...فرحت جدا وحلفت انه لازم يقعد شويه ويشرب معايا حاجه ...اول ما عامل البوفيه دخل علينا بقهوته ...انهار من العياط ..وقالى عارف لما حد يطردك من بيتك ويقعد فيه بيبقى احساس صعب والاصعب انك لما تيجى تشقر عليه تحس انك غريب رغم ان كل طوبه هنا محفور عليها اسمى ...
حاولت اهون عليه وهو مثل انه كويس واخدت معاه الصوره ...وقولتله ييجى تانى
وهو عند الباب والله العظيم بصلى كام ثانيه وعينه كلها دموع ومشى ....
تانى يوم الصبح اول ما وصلت اتصدمت من الخبر
عم جمال مات .....
كسرة النفس وحشه ...احساس العجز مميت ...الشعور بالغربه فى بيتك كفيل يقتلك ...
لو بس كانوا سابوله بيته ....لو بس جبروا بخاطره
كان زمانه عايش وسطنا
الله يرحمك يا راجل يا طيب ويكون بيتك فى الآخره احسن من الدنيا بكتير وعلى قد طيبتك يحاسبك ..
مش ناسيك والله
حتى نلتقى ،،،
ليست هناك تعليقات:
إرسال تعليق