مشيت يا صاحبي قبل ما اسلم عليك... مشيت وخدت الجدعنة والعيش والملح والاخوة والسنين وذكرياتها ياصاحبي... انا فاكر من 20 سنه لما قابلتك واحنا بنقدم فالكليه ومن ساعتها وانت صاحبي وبينا عِشرة وعيش وملح... خروجات الخميس والجمعه يا دوددا والحبسه في الكلية... كل التفاصيل فاكرها بالمللي ياخي... حتي في سفرياتنا مع بعض.. شقاوة زمان والضحكة اللي مالقلب... انا فاكر لما كنت ابقي مخنوق كنت اجيلك مصر الجديده وانت كنت بتجيلي شبرا نفضفض سوا... سيرتك حلوة ياخي بين كل الناس... محدش شافك ومحبكش... كل اللي عرفك حبك وفضل يحبك... اخر مكالمه يا صاحبي من اكتر من شهر وانت بتسالني هنتجوز امتي وهنفضل عُذّاب كده كتير وقعدنا نضحك ونفتكر ايام زمان... مكنتش فاكرها مكالمة وداع ياصاحبي...يمكن اكون مقهور وحزين على فراقك وقلبي اتقبض لما سمعت الخبر.... بس عارف ان ربنا بيحبك عشان انت انسان صافي من جواك وعملت خير كتير وانا عارف ده كويس جداا...
رسالة لكل واحد عنده صاحب جدع وعشرة عمر وبيحبه.. اشبع من صاحبك قبل مايروح... اشبع منه على اد ماتقدر..
ربنا يرحمك يا حبيبي يا اجدع الناس... ياللي كنت بتخدم كل الناس اللي معاه واسطه واللي مالوش حد... ربنا يرحمك يا صاحبي... مع السلامه يا ارجل وانضف واجدع واطيب و أحب الناس...وفاتك خط فاصل في حياة كل اللي حبوك وعرفوك وانا اولهم...
المقدم محمود يوسف رئيس جوازات مدينة نصر في ذمة الله بعد وفاته داخل مكتبه
ليست هناك تعليقات:
إرسال تعليق