دي لحظة لازم تقف فيها أي اعتبارات سياسية أو خصومات تاريخية ونقدم المصلحة العامة اللي هي الحالة دي مش السعي لمستوى معيشي أفضل لكنها مسألة حياة أو موت حرفيا
لكن ده مش معناه خالص التوقف عن انتقاد الحاجات الغلط - من وجهة نظرنا طبعا - بنسبة كبيرة قرار وقف الدراسة - واللي هو القرار الأصح - مكانش هيتاخد من غير إجماع الناس عليه ومطالبتهم بيه، لازم زي ما بنقول للمعارضة متستغلش الأزمة سياسيا نقول للدولة كمان توسع صدرها وتسمع من الناس احتراما لقلقهم وخوفهم على نفسهم وولادهم من ناحية، وممكن أراءهم وأفكارهم تكون مفيدة وفيها وجاهة من ناحية تانية.
على فكرة رغم إن خطة الحكومة البريطانية وجيهة وقايمة على دراسات وقدمها للناس علماء ومتخصصين أغلب البريطانيين مش مقتنعين بيها وبيشتموا فيها وفي الحكومة، ومواقع التواصل عليها فيديوهات ساخرة كتير من الأزمة، والإعلام نفسه يوميا بيسلخ الحكومة وبيطلع ناس تناقش الخطة وتكشف عيوبها، محدش اتقبض عليه علشان بيسخر من جهود الدولة ولا بينشر الشائعات!
في مسألة زي دي فيها حياة أو موت الناس تساندك وتقف معاك آه، لكن كمان مش هيدوك شيك على بياض ويحطوا لسانهم في بقهم، دي مش خطة اقتصادية لو فشلت يبقوا يغيروك في الانتخابات، دي حياتهم وحياة عيالهم وحبايبهم.
اطلبوا دعم الناس وثقتهم في نفس الوقت احترموا خوفهم وقلقهم
ليست هناك تعليقات:
إرسال تعليق